中環出更：許曉暉按摩好梳乎
新政府話要齊心做實事，少啲魄力都唔得，所以保健好重要。好似民政事務局副局長許曉暉（Florence）尋日為一間政府資助嘅中醫服務社企新店主持開幕禮時，就親身感受按摩師嘅中醫推拿，見佢個笑容就知好梳乎喇。Florence話，自己好鍾意學中醫理論，平時都有幫兩個囡囡按摩穴位，既能保健又增進親子關係。
香港職業發展服務處屬下社企「群力社企」，係民政事務總署首批獲資助成立嘅社企機構，佢哋開咗間一站式中醫服務店舖，營運愈來愈好，仲細舖搬大舖，尋日舉行新店開幕禮。Florence一場去到，即席搵中醫師、按摩師把脈兼推拿，玩足全套服務。佢引述醫師話，自己健康好好，自爆皆因練開太極同瑜伽，練得都幾fit。
囡囡發燒 都會推拿
其實Florence中醫理論深厚，講起推拿，佢話平日見個女發燒，都會幫囡囡按吓「心包經」穴位，即係手臂內側位置經絡，而佢個女平時冇咩事就會幫佢按摩背脊，話可以保健喎。