中環出更：巧遇名醫 汪阿姐變「粉絲」
協助唔少肝病患者嘅香港肝壽基金，日前舉行廿周年慈善籌款晚宴，城中名醫紛到賀。潮流興玩自拍，任嘉賓嘅八和會館主席「汪阿姐」汪明荃都唔執輸，遇上「換肝聖手」兼香港大學外科學系主任盧寵茂，都捉住對方自拍幾張合照，而食物及衞生局局長高永文上台時，汪阿姐又舉機不斷拍照，似乎成為高官同名醫嘅「粉絲」。
基金晚宴喺香港醫學專科學院舉行，筵開廿幾圍，除食物及衞生局局長高永文出席外，仲有骨科名醫郭有仁及太太郭許雪禮、晚宴籌委會副主席羅詠逑，有份擔任籌款顧問嘅蘇蔡潔蓮，都拉埋內分泌及糖尿專科醫生蘇沛霖捧場。
余錦基做歌王
雖然汪阿姐唔係醫生，但為善最樂，請纓拍心口上台唱歌，輕鬆唱三首歌就籌得十萬元。而肝壽基金籌款委員會主席余錦基（Lawrence）都唔執輸，上台同歌手合唱，唱完英文歌再唱中文金曲。原來Lawrence自幼就鍾意唱歌，讀拔萃男書院時仲係合唱團成員，難怪有唱家班水準。當晚基金合共籌得逾百萬港元。
肝癌已成為香港第三號癌症殺手，可惜肯捐肝嘅人仍然唔多。高永文就帶頭拿出一張器官捐贈卡，呼籲大家捐肝救人，佢已袋住張卡足足廿幾年，皆因第一張器官捐贈卡，原來由佢設計，所以特別有感情喎。
卓妮