南丫IV缺道門 驗船發現當冇事
在十．一海難中撞船下沉的南丫IV，其在起草設計圖則時已出錯，卻能通過海事處重重測試，並年年取得航運牌照。但原來在南丫IV建造期間，確有海事處驗船督察發現船尾欠缺一扇水密艙門，只是負責監督傾側測試的人員，以為做最後驗船的同事會跟進，而做最後驗船的人員，又推說之前審視的同事並無特別指明要覆核，結果在誰也沒跟進下，缺門一事便不了了之。
「冇乜特別就信晒船廠數據」
退休高級驗船主任何啟德昨到撞船事故調查委員會作供，他記得南丫IV在九六年一月底進行傾側測試時，他被指派前往監察，當日他有進入底層甲板船艙調查，更曾從油櫃艙的一個出入口進入尾舦艙，亦留意到該處沒有門。
由於何之前亦負責審核船廠就南丫IV提交的破艙穩定性計算數據，記得圖則及數據都顯示該處為水密艙壁：「無可置疑係水密，個出入口就要有道門。」但他解釋這並非自己的負責範圍，故沒將此事匯報：「我驗完之後仲有最後驗船，之後先至出牌，船廠仲有時間裝隻門。」
何啟德形容海事處角色被動：「佢哋裝番隻門後寫封信叫我哋去睇咁我哋就去睇……，佢哋最後無裝番隻門落去，我就唔知係佢哋搞錯定係點喇！」另外，他亦被指沒察覺船廠交來的計算數據出錯，他坦承：「一般船廠交入嚟嘅計算，我睇過無乜特別情況，我就信晒佢啲數據o架嘞！」
負責南丫IV最後驗船的高級驗船督察余極全就有另一番解釋。他昨稱，最後驗船於九六年二月十五日進行，「我只係負責檢查啲安全設施，救生、救火、航行燈之類，同埋要隻船行吓睇吓操作正唔正常。」
「冇人寫低特別事項要跟進」
他當日無再檢查結構是否符合圖則：「我只負責驗機器，睇番檔案船體結構嗰啲之前有同事驗晒，亦沒有人寫低有特別事項要跟進，船廠亦都無叫我哋驗……。」余的答案遭律師質疑：「船廠無叫你驗就唔驗，咁你哋咪唔係獨立專業咁去睇隻船符唔符合海事處要求囉？」余即澄清，若海事處驗船後有事項要船廠跟進，船廠處理後便會通知之後的驗船人員覆檢，但最後驗船當天船廠並無提出要覆檢水密艙門。