新一屆港區人大代表上星期一去咗深圳紫荊山莊，出席每屆都舉行嘅迎新會，期間有領導人發表書面講話，敦促三十六個港區人大同香港建制派要放下分歧，團結為港。不過，正正由於呢番講話，就引發咗新一屆港區人大嘅首宗內訌事件。
港區人大代表過往有不成文規定，喺集體會見完國家領導人，或者共同商議咗啲重要決定後，會先由正副召集人向傳媒統一發布消息，作出官方總結，之後先輪到其他代表各自表述同加以評論。由於上屆召集人袁武向來比較低調，發言人嘅工作就交咗畀副召集人譚惠珠負責。
但喺上周嘅迎新會上，新民黨副主席田北辰連個會都未開完，就急急離場接受傳媒電話訪問，並巨細無遺咁轉述書面講話嘅幾大重點，仲附送埋自己嘅評論。據聞此舉令唔少比佢資深嘅港區人大側目，私下批評佢「無大無細」，為博上鏡做壞晒規矩，當新選出嘅正副召集人無到。仲話如果田二少唔想下屆角逐連任時大跌票，就好好檢討吓自己嘞。
其實人大嘅責任係監督政府，提高透明度都係一種進步，田二少出嚟報嘅料如果無錯，點解一定要留畀資深嘅人大講？如果今次留番畀珠姐講，報嘅料有無田二少咁多呢？