政情：世界真細小 葛珮帆睇示範遇舊同學
立法會保安事務委員會上個禮拜二去咗粉嶺警察機動部隊總部，視察俗稱「聲波炮」嘅長距離揚聲裝置，其中一位參與示範嘅機動部隊教官，原來係委員會成員民建聯葛珮帆（EQ）嘅舊同學。兩人曾經一齊入讀演藝學院，但最後都無喺演藝界發展，一個就做咗警察，仲練到滿身肌肉；一個就做咗立法會議員，並喺咁特別嘅場合相遇，世事真係奇妙囉。
曾讀演藝 之後輟學
EQ話，自己當日一去到示範地點，已經見到呢位多年冇見嘅舊同學，兩人初時因相距太遠，只能點頭示意。示範結束後，EQ就立即上前與馬Sir相認並合照留念，但由於大家之後都有嘢做，交換咗幾句近況後就分道揚鑣。根據EQ提供嘅合照，黑黑實實嘅馬Sir好似有啲外國血統，不過EQ就代佢澄清，話自己廿幾年前第一次見佢時，都覺得對方個樣「鬼鬼地」，但其實佢係百分百土生土長嘅香港人。
咦？明明記得EQ係讀心理學同家庭治療O架，點解會有演藝學院識落嘅舊同學嘅？EQ話原來佢只係喺演藝讀咗兩年，之後就要輟學賺錢養家，冇畢到業，但啲舊同學都冇因而唔記得佢，聚會時都有預埋佢嗰份。