政情：張志剛逼坐教資會
近日有報道指政府有意委任行政會議成員張志剛，出任大學教育資助委員會（教資會）委員，但遭到高等教育界同教育局反對，除咗因為佢本身係「超級梁粉」，另一原因係佢曾經多次發言或撰文，批評部分大學嘅民調方法同反政府學者嘅言論。其實有咁多個樽都無咁多個蓋，有蓋又未必啱嗰個樽，所以未必個個崗位都搵到最適合嘅人選。
派信得過嘅人收風
教資會手握本港八間資助院校嘅財政生殺大權，因此每屆政府除咗委任一般社會知名人士出任教資會委員，亦一定會搵番一位「信得過」嘅行會非官守成員入去，最少可以收收風。但由於唔少行會成員都身兼大學校董，甚至做過某大學嘅校長或管理層，為免出現利益同角色衝突，畀其他大學質疑不公，政府非必要都唔會搵佢哋入教資會。
知情人士話，行會成員史美倫早前夠鐘卸任教資會主席後，政府一直都想搵番個行會成員入去，但搵邊個好呢？例如李國章就做過中大校長、羅范椒芬做教育統籌局常秘時得罪過唔少大學、「公職王」陳智思身兼嶺南大學校董會主席、「三料議員」李慧琼係科技大學校董、積金局主席胡紅玉等人亦另有重要公職擔任，所以都並非合適人選。
知情人士又話，其實仲有一位行會成員同各大學係全無瓜葛，佢就係「黃金五十」創辦人林奮強喇！不過自從佢捲入賣樓風波後，至今仍係無限期休假中。當局喺揀無可揀下，惟有明知具爭議性都推薦張志剛。
教育界變得政治化
知情人士抱怨，泛民同部分高教界人士質疑張志剛背景過紅，明顯係持雙重標準兼選擇性失憶，事關前教資會主席史美倫身兼港區人大代表，又做過中國證監會副主席，又無人話佢紅。其實自國民教育風波後，整個教育界都變得極為政治化，早前考評局主席陳仲尼被迫棄選港區人大代表就係一例。政府會否唔理反對意見，硬推張志剛入教資會，一日未公布都仲有變數。