政情：鄺祖盛積極推動戒煙服務
吸煙危害健康，所以唔少慈善團體都有提供戒煙服務，幫忙市民早日脫離煙癮。身兼樂善堂主席嘅「九龍城大地主」國際集團第三代鄺祖盛（Antonio）尋日出席沙田馬場樂善堂盃賽，透露該堂未來連串大計，其中一個計劃係「企業戒煙」服務，特色係毋須依賴藥物，靠嘅係煙民個人意志。
主動入企業開講座
Antonio話，現時東華三院及博愛醫院分別提供西醫及中醫戒煙服務，而該堂就破天荒提倡企業戒煙，一改以往被動嘅角色，佢哋會主動走入各大企業，開辦戒煙講座、提供心理輔導之餘，更實行「人mark人」戰術，將非煙民與煙民編為一組，方便監察。佢透露，現時已得到三十多間企業支持及參與，包括酒店、美容、地產等各行各業。
只靠意志唔靠藥物嘅戒煙計劃咁創新，成功機會大嗎？Antonio坦言，現階段尚在臨床測試中，不過以往靠意志戒毒嘅成功例子已有不少，佢相信吸煙主要來自心癮，只要煙民意志夠堅定，一定能夠同煙仔講拜拜。