政情：兩度叫錯「范長江」 長毛開竇夾着脷
社民連立法會議員梁國雄（長毛）喺大圍新翠邨嘅議員辦事處尋日開幕，一班泛民主派新界東議員都有捧場，唯獨民主黨主席劉慧卿唔見影，但長毛最估唔到係連建制派議員、中華總商會代表廖長江（Martin）都親自到賀。雖然Martin盛意拳拳，但長毛竟然喺致詞時兩度將廖長江叫咗做「范長江」，好彩Martin唔介意。
原來尋日Martin要喺立法會開會，但都特登抽時間趕去賀長毛，真係唔話得。Martin話，雖然大家政見唔同，但都係同事一場，議員辦事處開張係好應該祝賀吓咁話。
慨嘆被資產審查
議員辦事處開張本來係件開心事，但長毛就忽然感慨，回想同四五行動古思堯一齊喺荔枝角收押所嘅日子，又慨嘆自己今屆立法會都唔知做唔做到四年咁耐。我哋問長毛點解咁講，佢就提起最近因為住公屋而被資產審查事件，仲話︰「春江水暖鴨先知呀！」莫非佢暗示被人調查緊？