政情：高永文來者不拒
食物及衞生局局長高永文尋日好忙，朝早接受完電台訪問後，就拿拿臨趕去旺角花墟公園主持漁農美食迎春嘉年華開幕禮。一向人緣好嘅高永文繼續保持親民作風，市民要求影相都來者不拒，連有份出席開幕禮嘅家庭醫生關嘉美亦都擺晒靚甫士同局長合照。高永文之後仲滿場飛，花咗一千二百元買咗好多食品，實行出錢出力支持本地漁農產品。
高永文尋日一到場就喺攤檔買咗二十支粟米汁請在場嘉賓飲，而佢喺開幕禮致詞時亦大讚本地漁農產品好吸引。儀式完結後，佢就話受老婆所託要大舉入貨，大會人員於是帶佢去唔同攤位參觀，除咗試飲有機嘅番茄薯仔湯外，又試食用全環控水耕技術種植嘅沙律菜，佢大讚好味之餘又不忘提醒嘉賓「要食晒佢，唔係就變咗廚餘」。
撐本地漁農產品
高永文所到嘅攤位都吸引市民圍觀，有市民要求合照，更有人大叫「嘩，高醫生呀，我都要個仔好似佢咁考入醫科」。高永文行咗成個場，了解唔同攤檔點樣培植本地有機漁農產品，之後就用咗大約一千二百元買有機蔬菜、蜂蜜、雞仔餅同有機蘿蔔糕等戰利品離開，相信對太座都有個好交代喇。