政情：一舊雲又出醜 佗衰白鴿
施政報告宣布額外預留二十億元予十八區區議會推展「社區重點項目」，點睇區議員都係得多於失，點知沉寂咗一排嘅民主黨立法會議員新丁黃碧雲（一舊雲），竟然公開話要喺各區搵啲民間有公信力嘅機構代表監察撥款運作，講明擔心被主導區議會嘅民建聯（民記）把持撥款，擺明係眼紅啦。不過，民記蔣麗芸（Ann）就反駁，話區議員大多數係民選，又寸爆民主黨唔做地區工作就唔好多多懷疑，阻礙地區發展。
阿Ann瞄準開火
立法會民政事務委員會前日會議上，泛民主派多名議員都擔心呢筆撥款，會被建制派主導嘅區議會用作「蛇齋餅糉」，其中要數發言最出位嘅係「一舊雲」，開宗明義話項目被區議會主導，等於被民記主導，又要當局確保唔會將有關撥款變成民記下屆區會選舉嘅助選工程。之後佢又突然質疑有關監察機制，話依家嘅組合只有民政事務專員及區議員，建議搵民間有公信力嘅當區機構代表加入去委員會監察撥款喎。
加入議會後金句多多嘅阿Ann，隨即發言瞄準「一舊雲」開火，強調區議員係一人一票選出嚟，加上區議會運作公信力非常好，直斥「一舊雲」嘅猜疑可笑，反建議民主黨應就地區工作自我檢討。民記之後喺黨網站「建港者言」專欄以「請民主黨不要阻止地區發展」為題再度評論此事，喺結語部分批評「民主黨自己不做地區工作，當其他政黨去服務市民時，反而諸多懷疑，這是要阻止地區發展」，講白啲即係叫民主黨唔好阻住個地球轉。
事實上，民主黨六名立法會議員中，只有「一舊雲」地區經驗最淺，最弊係「一舊雲」前年喺區議會選舉輸畀西九新動力梁美芬，更加被人感覺佢根本唔熟區議會運作，但就喺度扮專家，完全係「夏蟲不可語冰」，睇怕「一舊雲」真係要全方位惡補吓各方面知識，否則開親口都自暴其短，畀人寸爆就無癮啦！