中環出更：細女報小學幟哥淡定交表
時下好多父母都想子女入讀名校，飲食達人「幟哥」黃永幟都唔例外！尋日係小學一年級統一派位報名日，九龍塘派位中心人頭湧湧，排隊人龍除咗富豪外，當然唔少得名人啦，卓妮就遇到飲食集團老闆兼電視節目主持人「幟哥」，估唔到佢都要現身撲位。幟哥話，要幫細女報讀小學，頭幾個志願有瑪利諾修院學校（小學部）及中華基督教會基華小學（九龍塘），卓妮預祝佢好運。
兩手準備好輕鬆
尋日在場好多家長為咗個小一學位愁眉深鎖，反觀幟哥就顯得輕輕鬆鬆，睇落一啲都無擔心。佢話一早已經幫囡囡做好打算，萬一派唔到心儀學校，就選擇去讀國際學校喎，仲話有學校已經一早收咗佢囡囡，唔怪得佢個心咁定喇。講開又講，依家啲小朋友細細個就要身懷絕技，百般武藝樣樣皆精，既然幟哥煮嘢咁掂，唔知平時會唔會教千金煮番兩味餸傍身呢？