中環出更：媽打娶新抱 最緊要「開枝散葉」

金刀梁話今次係佢自動請纓做見證人，事關佢咩都試過，就係呢樣未做過喎。做得見證人，當然唔少得向一對新人「訓話」。金刀梁話，知道新郎哥工作好忙，唔記得僭建都好，都唔好忘記結婚紀念日，婚後要繼續支持太太發展事業，仲要畀多啲空間屋企個衣櫃喎！

政商名流紛到賀

百足咁多爪嘅媽打娶新抱，唔少退休高官、政商名流嘅好友紛紛到賀，政務司司長林鄭月娥、食物及衞生局局長高永文、久病初愈嘅新界鄉議局主席劉皇發，仲有九十六歲嘅前行政會議召集人鍾士元都獲邀出席，前財爺梁錦松就「借出」兩子一女做花仔花女。一身紫色旗袍配水貂披肩嘅媽打滿場飛招呼親友，佢好開心咁話，住喺美加嘅九兄弟姊妹都專程飛返嚟飲呢餐，又大爆自己一日內忍唔住講咗八次「開枝散葉」，希望阿仔會識做咁話。

李麗娟（左）風騷滿場飛，與親家老爺（右）高興合照。	前教育局政治助理楊哲安（左）與太太張燊悅盛裝赴會。	梁錦松（後排左一）與太太伏明霞（後排右一）「借出」兩子一女（前排）擔當花仔花女，與楊鐵樑（後排中）喜相逢。（徐家浩攝）

新郎Chris一身間條禮服入型入格，新娘Miranda則穿上七萬元嘅Vera Wang婚紗，仲戴住老爺送嘅鑽石頸鏈，幸福滿溢。卓妮見新郎清減不少，佢坦言為咗影相好睇啲，刻意節食同做運動，一個月激減十磅。Chris盛讚太太靚女又善良，最緊要係錫自己。當晚一對新人深情對唱《Endless Love》，場面溫馨。二人透露會去美國度蜜月，承諾會盡快生番個蛇B，等媽咪湊吓孫喎。

卓妮