內地各省市嘅新一屆政協名單陸續出台，其中有唔少香港人爭住做嘅上海市政協，今屆出現大換班情況，原因係中央收緊咗同一人不得身兼人大政協嘅限制。過往港區人大代表只係唔可以身兼全國政協委員，做省市級政協就冇乜特別限制，但今屆就連省市政協都唔可以兼任。
因此新當選港區人大嘅上海市政協常委胡曉明、姚祖輝，以及一直身兼兩職嘅上海市政協常委嘅史美倫及上海市政協委員廖長江，今屆一律都無得留低。
盛傳新地非執董郭炳湘因捲入「新地案」，冇得再做全國政協常委，但佢細佬新地主席郭炳江，就順利連任上海市政協常委。
全國政協委員鄭明明就雙喜臨門，大女陳維蕊早前做咗北京市政協，細女陳維黛亦做埋上海市政協。四川省政協名單亦已公布，新入圍嘅香港人有東華三院主席陳文綺慧。