政情：寸金刀梁年紀大懶醒騸雞當眾出醜
薑愈老愈辣，好似香港大學校務委員會主席梁智鴻（金刀梁）尋日出席港大百周年紀念碑揭幕禮時，被民主黨立法會議員單仲偕（騸雞）寸佢老，點知金刀梁冇即時還擊，留待致詞時先當住現場新舊港大生寸爆鎅雞，令佢當眾出醜。
話說嘉賓名牌上印有畢業年份，早年畢業嘅金刀梁，似乎唔想暴露年齡，想遮住個年份，鎅雞於是上前整鬼金刀梁，寸對方大自己廿年。金刀梁不甘示弱，上台致詞時反擊話：「剛才單仲偕話我大佢廿年，如果係咁，我畢業時佢仲着緊開襠褲呀！」隨即引嚟哄堂大笑。
同場仲有明德學院校董會主席張永霖（Linus），佢自爆六九年曾出任學生會幹事，負責搞體育比賽，自己就迷上籃球、足球、柔道等項目，但講到運動健將，佢就謙稱係「通天後備」。
張永霖怒拆人哋宿舍
原來官仔骨骨嘅Linus，大學年代都做過「憤怒青年」，話說有次因為某件事，佢怒拆人哋宿舍，仲差啲被趕出校。講起特首梁振英發表嘅首份施政報告，Linus坦言管治香港唔容易，希望市民「領梁振英嘅情」喎！