我哋尋日講過，建制派、工商界及泛民主派議員瘋狂加入《2012年印花稅（修訂）條例草案》委員會，就徵收買家印花稅及加強版額外稅一事互相角力及討價還價，不過雙方未開戰前，尋日首次會議已經先就開會時間爆爭拗。尋日會議除咗選出正副主席外，仲訂出未來兩次開會時間，但大家夾來夾去都夾唔啱時間，有啲議員仲離譜到嫌太早開會添。
有關委員會順利選出民建聯（民記）李慧琼同民主黨涂謹申擔任正副主席，但討論未來開會日期時，就因為議員太多而出現阻滯。秘書處本來建議兩個日期舉行第二、三次會議，點知大家呢頭夾啱時間出席，嗰頭又夾唔啱其他委員會嘅會議。到秘書處提出早上八點半開會時，有啲委員就聲稱擔心有存在危險，話時間太早有流會嘅隱憂喎，莫非佢哋擔心自己太早起唔到身，搞到流會成為罪人？
一眾議員夾時間夾咗十幾分鐘後，最後以少數服從多數嘅投票方法解決咗開會日期，傾開會時間都搞咁耐，真係想像唔到以後開會情況會點喇，相信最頭痕嗰個會係主席李慧琼。