政情：議員濫開「會」阻延全民退保

每屆立法會會期，各事務委員會可以就某啲社會議題成立小組委員會討論，但今屆會期開始咗唔夠四個月，各事務委員會已經成立咗八個小組委員會，超出每年規定嘅成立上限之餘，部分議題更並非有迫切需要，導致有啲重要嘅民生議題未能討論，首當其衝係全民退休保障及優化強積金制度兩大議題。

目前各事務委員會轄下已成立八個小組委員會，包括融合教育、醫療保障計劃、長遠房屋策略、長期護理政策、鐵路事宜、噪音及光污染小組委員會等，而民政事務委員會及發展事務委員會，於上周五就搶閘召開聯席會議，仲即時「扑錘」成立監察西九文化區計劃推行情況聯合小組委員會，方便啲議員（目及）實西九嘅發展進度。原來有秘書處嘅職員提水，當時已經成立咗七個小組委員會，只餘下一個名額，如果被人搶咗就要明年請早喎。

嫻姐要同秘書處研究

雖然最後一個小組委員會都被「認購」，但福利事務委員會前幾日卻通過工聯會鄧家彪嘅動議，成立退休保障事宜小組委員會，研究全民退休保障及優化強積金制度。不過，主席陳婉嫻都擔心會超過小組委員會八個嘅上限，話要先同秘書處研究吓。至於民建聯主席譚耀宗就好心水清話，其實福利事務委員會仲有兩個議題排緊隊想成立小組委員會，如果再成立小組委員會，擔心委員工作量爆煲。

不過，鄧家彪就冇有怕，佢話今屆會期暫時未有政府草案需要成立法案委員會討論，秘書處理應有足夠人手應付第九個或第十個小組委員會喎。雖然議員有權不斷「僭建」小組委員會，但最理想當然係分先後緩急及重要性去成立小組委員會啦，無謂連累秘書處工作量大增嘛。