中環出更：兩女前後腳出嫁 田二少頭痕
新民黨立法會議員田北辰（田二少）一向恨做外父恨到流口水，尋日佢終於宣布好消息，好開心話兩個寶貝女就快出嫁。細女植鏘（Lavina）將會喺五月搶閘下嫁從事金融業嘅未婚夫Johnathan，而大女植恩（Lauren）就同搞社企嘅男友Bobby緊隨其後喺六月舉行婚禮。
田二少話，自己一向都好想快啲飲女婿茶，依家兩個女一齊出嫁可謂雙喜臨門，但佢話開心之餘又有啲苦惱。原來佢兩個女嘅大日子只係相隔一個月，雖然田太可以同時幫兩個囡囡打點婚禮細節，但由於兩對新人都想同時喺教堂行禮兼擺酒，搞到佢同太太都唔知請人去飲定係去觀禮好，因為唔知啲朋友有冇時間去晒四場嘛。
婚禮講詞唔可以重用
遲嫁一個月嘅Lauren仲要同爹哋講明，要爹哋喺細妹結婚後重新寫過另一篇婚禮講詞，仲要連一粒字都唔可以「recycle」（重用），否則一定會詐型喎。大女仲同爹哋約法三章，話婚後一年內都唔會幫手打理家族生意，因為要同老公享受二人世界。當兩個女嫁咗後，田二少話可能要將啲生意交晒畀個仔Lester打理，可惜個仔表明對時裝冇興趣，搞到佢唔知點算好。
卓妮