中環出更：曾裕孖契女搵靈感
早前一個下晝，卓妮見到身兼博愛醫院總理嘅「美容天后」曾裕（Joyce），好滋油咁喺商場閒逛，身邊仲有一位長髮靚女，兩人一邊行街一邊傾偈，仲不時開心大笑，睇嚟感情唔錯。原來呢位靚女係Joyce老友嘅囡囡彭湘淇（Cory），亦係Joyce嘅契女，當日兩人特意約埋去行影音店舖，為Cory籌備中嘅唱片搵設計靈感。
Joyce做扮靚呢行，貪靚係本分，當日佢一見到名店有靚衫，就忍唔住入去望兩眼，但最終都係空手而回。跟住兩人去到日前傳出喺英國申請破產嘅hmv，拿起一隻又一隻唱碟認真研究，Cory仲戴埋耳機試聽，聽咗好耐至捨得走。
彭湘淇出碟唔兒戲
卓妮上前同佢哋打招呼，Joyce話Cory又靚又叻女，所以除咗搵佢做旗下美容中心代言人外，仲全力支持佢做歌手。Cory讀緊大學時已兼職做模特兒，拍過唔少廣告同電影，最近決心出碟做歌手，仲跟隨名師學唱歌、跳舞，絕不兒戲。
講起扮靚心得，Joyce除咗勤做美容之外，原來仲有好多養生秘訣，包括朝朝做半小時運動，經常食糙米粥及戒食糖，難怪佢幾時都咁Fit喇。Joyce依家瞓身投入慈善事業，除咗加入博愛之外，仲創辦「身心美慈善基金」，默默為社區婦女及兒童送上愛心。
卓妮