新一份施政報告話要加強取締濫用公屋人士，即係話有錢嘅唔該快啲搬走，騰空畀有需要人士，大家即時諗起做咗咁多年立法會議員，仲住緊喺公屋嘅社民連主席梁國雄（長毛）。長毛話唔知係咪咁好彩，政府早前就派人審查佢個銀行戶口，仲上門去佢屋企「家訪」。不過，長毛堅稱冇濫用公屋，因為佢成副身家都係得九萬元，繼續符合入住公屋資格喎。
政府不時會派人審查公屋住戶，睇吓當中有冇富戶存在，如果有就叫佢即刻搬走。長毛做咗咁多年議員，每個月最少都有七萬多元人工，連埋其他津貼都唔少錢，所以有人質疑佢點解仲住緊公屋，其實都係好合理，難為佢仲講得出口話政府派人查佢家宅，唔知係咪想踢佢走。
不過，長毛話咁多年嚟一直有交雙倍租金，而佢副身家都係只得九萬元，有排都未超過資產上限，話點解唔可以繼續住公屋喎。
其實大家都知長毛收入唔差，只係每個月都將大筆錢轉畀社民連，咁呢招變相轉移資產講唔講得通，公眾自有判斷。講到底，公屋究竟係畀使大咗嘅有錢人住，定係提供畀收入低嘅市民住，相信長毛心中有數。