政情：名單冇影惹傳言 黃友嘉公職爆燈要推辭
政府早前公布委任新一批諮詢委員會成員，好多都大執位，其中廉政公署社會關係市民諮詢委員會、紀律人員薪俸及服務條件常務委員會委員名單上，唔見咗中華廠商聯合會前會長黃友嘉（David）個名，惹來外界揣測佢因為「唐營」身份而被炒魷。面對傳言，David一笑置之：「我已有六項公職，爆晒燈，唔辭啲點得呀！」
忙見團體傾扶貧
高票當選港區全國人大代表嘅David，選舉後未見清閒，原來佢係「公職王」。除咗人大代表身份外，佢仲身兼扶貧委員會社會參與專責小組主席、經濟發展委員會籌備小組成員、土地及建設諮詢委員會主席、破產欠薪保障基金委員會主席、外匯基金諮詢委員會委員，加埋浸會大學校董，名副其實公職爆晒燈。
以扶貧委員會公職為例，David近排頻頻會見唔同慈善團體、社福界代表同商界領袖，傾吓點樣透過商界參與，加大扶貧力度。雖然政府冇指定要佢幾時交功課，但David笑言「時間無多」，事關二月係農曆新年，三月又要上北京開人大會議，所以啲工作要逼埋呢幾星期一齊做喎。