政情：林大輝 葉劉「拍散拖」

沙田區「親兵」 直選籌碼

雖然大輝係工業界功能界別議員，但佢多年來做咗唔少地區工作，本身都儲落唔少樁腳，尤其係沙田區更有唔少「親兵」，呢啲珍貴資源到直選時非常有用，所以佢早前主動放風話想加入黨，就係想睇吓有冇政黨搵佢傾偈，繼而商討點樣合作。近年銳意大展拳腳嘅新民黨，當然好想吸納大輝入黨啦，而大輝亦覺得新民黨條路線有得發圍，可以跟大隊暢所欲言鬧政府，為將來直選鋪路。

不過，聽聞大輝覺得新民黨喺新界東冇樁腳幫佢，反而自己嘅「親兵」仲多過對方，暫時計落條數未有着數可言，所以一直吊住該黨主席葉劉淑儀嘅癮，既冇話唔入黨，亦冇話入黨，總之拖得一時得一時。有政界中人形容，佢哋雙方目前仍然係「拍拖」關係，最後能否拉埋天窗，就好睇大輝點決定喇。不過，萬一葉劉搵到好人選落戶新界東插旗，咁大輝就因住「蘇州過後冇艇搭」呀！

聽聞自由黨都有向大輝招手，但據聞大輝講到明要出戰新界東，除非該黨議員田北俊肯放棄連任讓路，否則大輝落場參選肯定爭票爭到頭崩額裂，甚至兩敗俱傷收場。

言論太惹火 政黨有戒心

雖然多個政團都向大輝招手，但亦有建制政團好怕大輝言論太過惹火、走得太前，擔心壞咗大事，所以目前對雙方合作仍然持觀望態度。其實政治好現實，講到底都係互相利用，究竟大輝最後情歸何處，相信稍後自有分曉。