中環出更：楊駿業壯大「素食兵團」
素食漸成風氣，富後代楊駿業（David）近期積極推動嘅周一素食運動，啟動短短八個月，茹素人士數目激增。踏入新一年，David再下一城，早前舉辦首個素食講座，邀請名人分享素食心得，仲擺下「素食陣」，任食任試，吸引五百多人出席。反應咁好，難怪David計劃將素食文化帶到內地，將邀請北京大學、清華大學學生加入「素食兵團」。
David之所以希望將「綠色訊息」帶到內地，原來早前佢同清華大學代表講起想喺校內飯堂推出素食餐單，校方都話好支持。稍後會邀請埋北大同陝西師範大學加入，預計下年就會成事；若內地學生都加入呢個素食大家庭，認真唔講得笑喎。其實David六年前已關注內地愛滋病患者，又捐錢喺清華大學成立愛滋病研究中心，熱心推動愛滋病防治工作，對中國感情深厚。
排長龍試素菜
講番個素食講座，參與素食運動嘅魏華星、「手襪女王」林曉盈及舞台劇演員彭秀慧等齊齊分享素食嘅好處；即場仲有多個攤位試食素菜，包括出爐素Pizza、素串燒、素沙律，仲有熱辣辣蘑菇素湯，吸引人大排長龍。David睇見都話好欣慰，笑言食素唔再獨沽一味得「羅漢齋炒麵」，只要大家願意食素，一樣食得好開心。
卓妮