行政長官梁振英（CY）每逢到立法會，次次都引來大批示威者，有人爆料話社民連利用立法會秘書處漏洞，申請過百張職員證，然後派畀義工，等佢哋可以喺議事廳外四處游走，極容易向CY舉牌示威。社民連主席梁國雄就解釋，佢根本無申請過咁多張職員證，只係幫義工申請訪客證，但訪客都有權利示威。
如果係手持職員證，照計立法會保安都唔可以趕佢哋走，至於持訪客證嘅外來人士亦有好大自由度，但唔可以上議員辦公室，亦唔可以擾亂立法會秩序。長毛承認，近期的確有幫班義工申請訪客證，秘書處有晒紀錄，仲話訪客都係人，都有權利示威，如果啲訪客不滿CY，點解唔可以示威呢？
立法會行政管理委員會尋日就討論上述問題，建制派當然唔滿意社民連利用職員證同訪客證咁樣玩法啦，但班泛民主派就好支持，尤其係民主黨主席劉慧卿，佢話議員助理示威都係工作範圍之一喎。金融界吳亮星聽到呢句即刻火起，鬧爆卿姐咁做即係「知法犯法，罪加一等。」究竟社民連今日會否再用呢招向宣讀施政報告嘅CY示威，而立法會保安又有咩應對呢？今日答案就會揭曉。