政情：國泰高層讀U才搭飛機

參觀飛機廠立定志向

Chitty話，佢到讀大學一年級先至第一次坐飛機，仲要係自己一個人飛去西雅圖咁遠，當時不知幾興奮，仲要咁啱有個同學嘅爸爸喺飛機生產商波音公司工作，所以就帶咗佢去參觀波音飛機廠，見到啲飛機嘅裝嵌過程，令佢大開眼界，仲立志要投身航空業添。

闊別四年嘅國泰「空中之旅」活動再度推出，對於讀大學先至首次搭飛機嘅Chitty嚟講，自然更落力推介，希望基層小朋友同家人都可以一嘗遊「飛機河」嘅滋味。佢話今次「空中之旅」會喺今個月二十七日舉行，邀請來自東涌、元朗及觀塘等二百幾個來自單親兼低收入家庭的小朋友，同屋企人一齊坐飛機，圍繞香港飛行，等佢哋可以感受一下遨遊天際嘅樂趣。