新巴N8站擺位欠方便
「一個站喺邨頭，兩個站喺邨尾，點解唔擺一個站喺商場出面嘅巴士總站，話晒都係中間位，點都方便啲！」筲箕灣耀東邨居民梁先生指出，來往灣仔碼頭及杏花邨之新巴N8屬唯一恒常途徑該邨的通宵巴士，卻僅於耀華、耀興及耀貴樓設分站，由於三個分站位處邨內「一頭一尾」，對於不少居民造成不便，「次次都要喺耀興樓落車，再撐上斜路先返到屋企，啲老人家會好辛苦！」
運輸署發言人證實，已知悉市民訴求，經與巴士公司商討後，決定將分站遷移。
新巴發言人則說，考慮當區居民意見後，已向運輸署申請遷移該線的耀興樓分站往耀東商場外巴士總站，以方便居民出入，有關遷移即將完成。
「反映咗咁耐都冇回音，一搵《東方》幫手就搞掂，真係唔該晒！」梁先生希望運輸署及巴士公司日後繼續認真考慮乘客意見，改善服務質素。