上屆政府推出的派錢六千元計劃，據悉仍有約十二萬合資格市民未在限期前登記，相信當中不少人是自願放棄領取六千元，反映港人並不貪心。有議員認為庫房有「意外之財」，建議將派剩嘅七點三億元用來加碼扶貧，有針對性地用於在職貧窮及「N無」人士身上，老朽絕對贊成。
香港貧富兩極；貧者面對通脹壓力，衣食住行樣樣加，牛肉成天價，豬肉又狂加；至於樓價有幾高幾唔合理，「劏房也有很四正」的，為官的，飽漢不知餓漢飢，四正嘅劏房，講真，租都唔慌會平啦！
「民生無小事」，政府話就話急民所急，之不過，新一年，面對社會瀰漫一片加風，政府又真係出手做過乜嘢「實事」？要加嘅始終會加，唔應該加嘅一樣又加！
民生多艱，生活逼人，早前話食物銀行告急，因通脹加劇及業主大幅加租，多間營辦食物銀行嘅機構近日求助個案飆升近三成，有機構更實行新限制，規定申請人一年內最多只可申領三次服務，以應付額外需求，並促政府將服務恒常化，開拓飯堂服務向受助人提供熱食。
六千元計劃派剩七點三億元，「意外之財」正好用來急市民之所急，為食物銀行「注資」；寒冷天氣警告生效時，開放多些宿位及提供多些熱食給有需要的人士！新政府要多建公屋，即使有心卻無力，一如本報「正論」所指出「移山填海樣樣難，安得廣廈千萬間」，先讓市民填飽肚子才高談其他吧！施政報告後日「報告」完，窮困者依然「家貧怯過年」！