政情：民記揼本 硬撼鐵頭仁
過去兩年好幾個選舉先後完成，未來最快要等到二○一五年區議會選舉先再度開戰，但一場選舉嘅完結就係另一場選舉嘅開始，好似民建聯咁，已經做定預備工夫。民建聯主席譚耀宗尋日殺入屯門啟豐花園開地區辦事處，嗰度嘅當區區議員正正係民主黨前主席何俊仁，可以話係踩入白鴿陣地，譚Sir目標非常明確。
譚Sir開辦事處，唔通下屆區議會選舉由佢親身上陣同鐵頭仁硬撼？當然唔係啦，原來辦事處用譚Sir名義開，但實際係畀社區服務主任侯國東打骰，譚Sir仲周圍同班街坊講，話有咩事都要搵阿東幫手，即係擺明捧呢位後生仔上位。
譚Sir話個辦事處月租都要萬幾蚊，但只要服務到街坊就值得。嘩，以往通常係選贏嘅區議員先有資源開辦事處，但民記竟然掉番轉，為咗鞏固地盤，不惜大灑金錢，咁捨得揼本，唔怪得之民記近年咁多新人湧現啦。
阿東去屆區選曾經喺屯門兆禧挑戰民協嚴天生，最後以些微票數落敗，現時轉區至鐵頭仁呢區，其實喺地區嚟講，嚴天生同何俊仁都係一樣咁重量級。唔通連民記都覺得，白鴿黨容易應付過民協？