政情：貪曾摧毀諮詢機制
新政府上場後面對連番挑戰，推出唔少政策都畀人鬧無做諮詢，好似「五司十四局」改組、新界東北發展等等，全部被人批評霸王硬上弓。新民黨副主席田北辰尋日喺一個電台節目度講到有關情況時一語中的，話今時今日出現呢個政治局面，多得以往政府唔識做諮詢工作，令現屆政策好事變壞事。唉，估唔到「貪曾」前特首曾蔭權爵士離開幾個月，都繼續遺禍人間，真係害人不淺。
田二少話，自己參選立法會時，都盡量將政綱同施政理念話畀選民知，但以往政府根本唔識咁做，每逢做諮詢工作都流於表面，向市民解釋時只用單向、用艱澀難明字眼，社會未有共識就硬闖立法會，同「撼頭埋牆」無乜分別，最終搞到市民懷疑政府推出政策係另有目的。
做壞手勢 加劇民怨
其實田二少絕對講得無錯，貪曾過去多年就係咁做嘢，令霸王硬上弓文化遍布成個政府架構。就算現時改朝換代，由行政長官梁振英執政，但成個體制已經做到慣晒手勢，要一段時間至可以改變，搞到近期推出政策嘅手法都好似前朝政府咁，最終加劇民怨。其實貪曾係政務官出身，過去港英政府醞釀政策，都用較長嘅時間諮詢唔同團體，用時間擺平矛盾，只係貪曾心急，成個諮詢機制可以話畀佢摧毀咗。
「講價文化」同「跪低文化」就係喺貪曾嘅急就章諮詢下應運而生，政黨以為事事都有價可講，甚至知道政府有可能舉手投降，眼看唔夠票喺立法會通過就將政策收回，特區政府亦都係畀貪曾搞到愈嚟愈弱勢。
田二少話今屆政府有唔少德政，例如長者生活津貼咁，但都係因為政黨嘅「講價文化」同「跪低文化」，令香港近年發展停滯不前，有政黨更加不顧大局利益，甚至逢政府必反，講到尾，香港出現呢兩大問題，都係貪曾執政多年所惹嘅禍。只怪香港人命苦，貪曾禍港七年，唔單止令香港空轉七年，而且種下太多禍根。