中環出更：神童志：我唔同人打交
早前傳出港交所前行政總裁鄺其志（神童志）喺馬會泳池將華人置業副主席劉鳴煒個頭撳落水，馬會喺收到投訴後褫奪神童志遴選會員資格。鄺其志無出席社交場合久矣，佢尋日高高興興現身新民黨慶祝成立兩周年酒會，首次開腔解釋事件。
神童志話，成件事純屬傳聞，自己一向脾氣好，唔會同人打交，更唔鍾意同人有肢體衝突。神童志仲話，依家隔兩日就會去游水鍛煉身體，但被問到仲有無去馬會游水時，佢就神神秘秘咁話：「我唔答你。」
劉江華仲摸索緊
新民黨主席葉劉淑儀任職政府多年，人面廣，尋日捧場嘅有好多現任同前任官員，政制及內地事務局副局長劉江華就話，上任未夠一個月，仲要時間適應摸索吓。佢仲話，返新工後都有打電話畀唔同黨派議員傾偈，不過因為之前好多人放假唔喺香港，所以有啲未聯絡到，一定會盡快逐一拜會。做咗官，個人反而變得咁謙卑。
卓妮