發展局局長陳茂波（阿Paul）上任無耐，就被傳媒揭發太太名下公司持有劏房，之後又畀記者影到佢疑似醉駕，搞到佢一身蟻。阿Paul事後承認的確有喺揸車前飲過酒，自信符合法例要求，但始終無講清楚飲咗幾多，令人對佢嘅解釋大打折扣。近日終於有人爆料，話陳茂波當日只係飲咗好少啤酒，有「酒駕」而無「醉駕」。至於點解當時唔對外解釋清楚，原來背後有段古。
話說當日喺山光道馬會會所，阿Paul同老婆、囝囝同另一位友人食晏。由於當日係公眾假期，大家都唔使返工，一家人食得開心，有人就建議叫啤酒飲。阿Paul負責向侍應落柯打，因此出現報道中佢「一杯未飲完，又叫第二杯」嘅景象。
但實情係阿Paul全程都記得自己當日要揸車，所以佢不停將啲酒倒畀其他人飲，佢本人只係飲咗好少。
無公信力嘅傳媒當然屈得就屈，所以只報道阿Paul叫啤酒嘅情節，無寫佢其實飲咗幾多。但由於阿Paul真係唔記得自己叫咗幾多杯、大家又各自飲咗幾杯酒，為免再畀人口實，先至忍住唔反駁。