香港房價近年狂升，等待上車盤嘅「無殼蝸牛」隨處可見，殊不知有問責官員都係其中一分子，講緊嘅係教育局副局長楊潤雄，事關佢嘅利益申報顯示佢並冇持有任何物業，亦非任何政黨或組織成員，除咗申報佢太太係主婦外，就只有賽馬會會員一項。有人估計楊潤雄身家超級清白，或者同佢係政務官出身，本身已經高薪養廉有關係喎。
相對楊潤雄嘅「無殼蝸牛」，教育局政治助理施俊輝（Jeff）嘅居住狀況或者好些少，因為佢報稱居住喺沙田嘅自住單位，查實係同親屬各持有百分之五十業權。據聞呢位親屬就係Jeff嘅媽媽，可能因為未結婚，所以仍然同媽媽一齊住，又或者係佢孝順都未定。
此外，Jeff嘅申報又披露已經辭去新民黨執委等職務，依家只係新民黨成員，佢亦申報咗合共九個團體嘅成員身份，部分同佢本身「福建幫」身份有關，好似福建社團聯會會員、晉江同鄉會會員等；另一部分就係集中喺教育範疇嘅聯繫，包括史丹福大學香港校友會會員、史丹福大學舊生會永久會員、九龍華仁書院舊生會等，睇得出Jeff未加入政府之前，其實已經開始活躍於公民社會。