政情：不甘捱打出招 馮檢基用木蝨鬥鼠王芬
民協立法會議員馮檢基盤據九龍西多時一直欠成名作，相反西九新動力主席梁美芬遲來先上岸，憑幾年前到旺角街市滅鼠一役成名，贏得「鼠王芬」稱號，最近更心郁郁想喺下屆區議會選舉重錘出擊「拔筍」（竹筍係民協徽號），不甘捱打嘅阿基終於絕地大反擊，喺地區主打殺滅木蝨問題抗衡鼠王芬，睇怕木蝨基同鼠王芬嘅大戰將會好戲連場。
深水埗老舊問題
民協喺九龍西老巢經營多年冇乜佳作，近年更因資源精力分散搞到發展「有縮無增」，多個根據地都被建制派攻陷，特別係由鼠王芬領導嘅西九新動力更步步進逼，阿基近日終於知驚，迅速聯同六名區議員向深水埗區議會，聯署提交一份名為「要求政府全面處理木蝨問題」嘅文件，要求喺本周二舉行嘅區議會大會上討論，用意明顯係想抗衡鼠王芬。
究竟阿基搖身一變成為「木蝨基」大反擊，能否重新搶回基層市民嘅心仲係未知之數，但阿基等人對於社會議題嘅敏感度認真有待改善，事關本報喺去年多次獨家踢爆木蝨攻港路線圖同時間表，據聞深水埗呢個舊區更加係重災區之一，阿基到依家先至高調去跟進呢個老舊問題，不如早啲瞓壓死木蝨好過啦！