政情：出櫃慢必明屈譚志源
立法會選舉結束後，人民力量議員陳志全（慢必）就「出櫃」承認同性戀者身份，之後反性傾向歧視行動一浪接一浪，有泛民主派議員更大力吹風，話政府會喺《施政報告》交代《性傾向歧視條例》立法諮詢工作，搞到政府近日急急澄清。其實政制及內地事務局局長譚志源（Raymond）只係講過會喺《施政報告》交代政府會點樣消除性傾向歧視，但冇提過會展開立法諮詢，變相焗住被人老屈。
政府從冇明確表態
泛民早前一直吹風話政府會喺星期三發表嘅《施政報告》交代就《性傾向歧視條例》立法嘅諮詢工作，所以政府日前就急急腳搵官員出嚟澄清絕無此事。點知工黨議員何秀蘭（Cyd）、慢必前日就聯同幾個已「出櫃」嘅藝人喺立法會舉行記者會，慢必仲話最憤怒嘅係本來啲官員已經明示、暗示話會交代諮詢工作，但依家又話唔搞。不過，我哋翻查資料，其實政府一直都冇明確表示點搞呢個咁具爭議性嘅議題。
雖然Raymond曾經喺立法會政制事務委員會提過，特首梁振英會喺一月份《施政報告》作出交代，但都只係貫徹番當局回應之前阿Cyd提出嘅《同志平權》議案，當時只係話會掌握最新嘅情況同變化，以決定現屆政府點樣可以做好消除性傾向歧視嘅工作，政府對於係咪就呢個議題進行立法諮詢工作係持開放態度，但係由始至終冇講過政府會喺《施政報告》中交代立法諮詢工作。
多搞活動製造輿論
有關方面話，Raymond之前都有提過，按照外國嘅經驗顯示，諮詢都係為立法做準備嘅，所以在社會就有關議題未有共識前，政府又點會咁快為立法做準備呢？有精力都不如擺多啲心機去拆解迫在眉睫嘅民生議題啦。不過，慢必話政府唔搞都冇佢符，惟有搞多啲反性傾向歧視嘅活動，製造輿論向政府施壓。