中環出更：陳文綺慧老公 煮餸似煲藥
現今社會男女平等，「入得廚房」已經再唔係女人嘅專利，好似東華三院主席陳文綺慧（Viola）就有個煮得一手好菜嘅老公，佢就係「靈芝大王」陳宇齡（Abraham）。Viola話，老公成日都話煮餸easy job，道理就好似煲中藥咁，有啲材料要「先煎」、「後下」，有啲就要用猛火、文火去煮，咁至可以發揮到食材嘅最大作用喎。莫非Abraham經常接觸中藥，所以從中獲得烹飪靈感？
Viola話，平時忙到冇時間開飯，所以放假寧願留喺屋企攤抖，煲吓電影聽吓歌減壓。呢個時候，佢老公Abraham就會發揮廚藝天分，見到屋企個雪櫃有乜嘢材料，就發揮創意，就地取材，煮出創意美食氹老婆開心。Viola對老公嘅廚藝都幾滿意，好似前排食過嘅魚子意大利粉，佢就盛讚有大師級水準，仲笑言好彩自己屬於食極唔肥一族，否則肯定變肥婆。Viola為咗籌備各項慈善工作，已經成年冇去過旅行，所以嚟緊三月底卸任後會考慮外遊，好好休息一吓。