中環出更：葉瀚林夫婦親親大自然
前高官葉澍堃其長子葉瀚林（Hiram）上月初迎娶拍拖十年嘅女友朱敏盈（Connie）後，隨即到南美洲度蜜月三星期，盡興而歸。Hiram好回味咁話，今次旅程遊遍南美及赤道國土，最享受喺全無手機訊號下，靜心欣賞大自然嘅奇妙生態，二人與壯麗景觀形成強烈對比，自覺渺小。
Hiram兩夫婦喺今趟旅程中，歷盡浪漫與刺激，佢哋先去咗阿根廷首都布宜諾斯艾利斯逗留數天，居於近郊一間充滿大自然氣息嘅小旅店，享受悠閒寧靜。去到阿根廷，當然唔少得參觀世界三大瀑布之一嘅伊瓜蘇瀑布（Iguazu），欣賞偉大景觀。
潛水遇上鯊魚
之後佢哋前往厄瓜多爾位於赤道嘅首都基多古城（Ecuador-Quito），呢度海拔高逾二千八百米，被列入世界文化遺產。當地盛產可可豆，Hiram兩公婆見到又平又靚嘅可可豆，都忍唔住買嚟做手信。最後一站，佢哋去到加拉帕戈斯群島（達爾文島）潛水，期間驚見鯊魚擦身而過，好彩呢種鯊魚係食素，唔使做鯊魚「點心」。
Hiram話，行程中最辛苦嘅係有日凌晨四點鐘就爬起身睇海龜生蛋，接住睇日出。不過，佢哋異口同聲話，良辰美景千載難逢，幾攰都值得喎。計埋今次旅程之後，佢哋終於去勻晒世界七大洲開眼界，依家仲積極籌劃下次旅行，目的地係去南極睇企鵝喎。
卓妮