政情：李秀恒慧眼低價吸工廈
中華出入口商會副會長李秀恒鍾情投資工廈，而且受益於政府活化工廈嘅政策，令佢搖身一變成為酒店大亨。講起點解當年咁獨具慧眼，洞燭先機趁低吸納一批工廈呢？原來佢有個搞笑嘅「村姑變港姐」獨特法則。
話說立法會議員林大輝出版嘅通訊中，搵咗李秀恒做專訪欄目「名人對談」主角。今時今日，係人都知工廈有價有市，但係七、八年前，工廈售價幾百元一呎都冇人吼，但隨住政府推出活化工廈政策，仲可能開放工廈做住宅，結果工廈身價飛漲近倍。八年前大手掃入工廈嘅李秀恒話，如果買豪宅或寫字樓，無論升跌本質都唔會變，物業本身價值唔會再提升，但工廈就可以大幅增值，有機會由村姑變港姐喎。
同李秀恒相熟嘅朋友都知佢醉心攝影，經常帶埋專業攝影器材出外旅遊，例如去非洲睇動物大遷徙。今期專訪就用咗一張佢去北海道影相嘅英姿，戴上黑超、披上彩色頸巾嘅佢，同着上迷彩衣嘅相機及腳架一齊入鏡，有型有款。