政情：陳岳鵬施俊輝初哥淡定
新政府首份施政報告公布在即，政制及內地事務局政治助理陳岳鵬（Ronald）同教育局政治助理施俊輝（Jeff），尋日孖住出席東九龍居民委員會活動，同約二十名中學生交換意見。期間Ronald極少觸及惹火嘅政制問題，反而屢次要就「雙非」孕婦、水貨客等問題解畫，幸好Ronald都尚算應付自如，冇喺一班學生哥嘅面前失威。
聚焦教育議題
基本上尋日同學嘅提問都聚焦教育議題，較為多談論嘅係「三三四」新學制、升讀大學學額數目等，Jeff都逐一回答，有時仲會分享吓自己吸收知識嘅心得，難怪佢事後話感覺好似返番中學教通識教育咁喇。不過話說回來，東九龍居民委員會歷任主席都係建制派中人，安全系數其實都幾高，加上Ronald同Jeff做過新民黨主席葉劉淑儀「愛徒」，訓練有素，無驚無險又過一關都屬預期之內。