政情：貪曾滴水不漏基層最慘
曾經喺「貪曾」前特首曾蔭權爵士治下出任社會福利署署長嘅余志穩（阿魚），退休三年依然退而不休，除咗先後擔任融樂會執委同樂施會總裁，更加入新政府嘅扶貧委員會，而且評論時事擲地有聲。對社福問題富有經驗嘅阿魚，尋日出席電台節目時再次狠批前朝貪曾政府死守「大市場、小政府」原則及以「漏斗理論」治港，完全無助解決貧富嚴重兩極化問題，造成社會不公平、不公義亂象。
雖然阿魚喺任人唯親嘅貪曾治下政途黯淡，但去年旋即被新上任嘅特首梁振英（CY）睇中，邀請加入扶貧委員會，為本港扶貧政策獻良計。
多次接受富商款待
阿魚尋日以樂施會總裁身份喺電台節目提起貪曾禍港七年，令本港貧富懸殊情況嚴重，就忍唔住發炮，點名批評貪曾以「漏斗理論」治港唔單止冇效，更造成社會不公平、不公義亂象，「只要勤力都可以做李嘉誠」嘅理想從此只能回味。
事實上，貪曾治下全力秉承「假大空」作風，提出「紐倫港」、「大市場、小政府」同「漏斗理論」等治港口號，其中「漏斗理論」美其名係先照顧大財團利益，經濟繁榮嘅成果最終會滲漏到基層市民手中。不過，眾所周知，貪曾貪盡海陸空，唔單止充分照顧大財團利益，更多次接受富商款待鐵證如山，有咩油水都畀佢舔乾舔淨，唔怪得基層市民多年來連油水都冇滴喇！
「輝煌成就」掩蓋失誤
阿魚又喺節目上不點名批評，有政府官員對本港營商環境多年來高踞全球前列「沾沾自喜」，呢個咪就係貪曾時任財政司司長時成日掛喺口邊嘅「輝煌成就」？「民心我心」嘅阿魚好言相諫，直指本港環境有利投資者營商，正好反映福利政策唔完善，暗踩某啲人叻都叻唔切。所以佢期望CY首份施政報告能夠擺脫前朝一味只靠派錢扶貧嘅陋習，盡快討論設立全民退休保障制度先係王道。