中環出更：徐晉暉拜師學詠春
年前上映嘅葉問電影掀起一陣詠春熱潮，唔少人都四出叩門拜師學藝，希望練得一身好武功。中華廠商聯合會副會長徐晉暉（Marvin）近期同詠春結緣，都係由此而起，佢仲特意喺屋企安裝咗個詠春木人樁，方便日夜都可以鍛煉，表現認真。
平時西裝骨骨嘅Marvin，原來十分好動，足球、網球、壁球、滑雪都鍾意，但佢話自己細個嘅時候，其實係對功夫武術最感興趣，但係當時家人都主張佢參與靜態嘅課外活動，所以一直都無緣接觸武術。直至早前一陣葉問潮興起，猛然撩起佢心中對詠春嘅一團火，及後因緣際會遇上恩師趙師傅，終於得償所願，與弟弟徐晉曜雙雙去學詠春。
家有木人樁 閒時打幾拳
Marvin話，首次邂逅詠春嘅感覺好新鮮，依家閒時喺屋企經過個木人樁，都會打幾拳練吓。講到學拳嘅心得，佢笑言除咗要有恒心之外，最重要係得到太太同家人嘅支持，如果唔係，屋企又點可能畀佢擺咁大個木人樁呢？