中環出更：仁濟籌款勁 見證善長情
近排寒氣逼人，幸好人情暖笠笠。仁濟醫院前日喺九龍灣舉行仁濟慈善雙周慶功宴暨頒獎禮。仁濟主席鄭承隆、副主席梁昌明（Raymond）、蘇陳偉香及一眾總理踴躍現身，與有份出錢出力嘅街坊歡聚，場面溫馨熱鬧。今次善款近六百萬元，係近年難得嘅好成績，鄭承隆話香港人情味濃，呼籲大家繼續將溫暖傳開去。
仁濟總理王賢訊（Vincent）及太太朱穎詩（Vincci）亦去撐場，仲有人氣急升嘅鋼琴學校創辦人邱世傑（Ricky），原來佢同Vincent係鄰居。Ricky近期聲名大噪，事關佢教導多名揚威國際嘅鋼琴神童，仲連續兩年獲得世界傑出華人，勁受城中父母追捧。Vincent嘅囡囡未夠兩歲，但驚執輸都係幫囡囡報定名先喎！
當晚到場嘅仲有副主席馮卓能、總理郭小瑜及「仁濟表妹」賴煒琳等人，啱啱當選港區人大代表嘅南旋集團主席王庭聰都有現身，原來佢曾經係仁濟總理，當日特意去捧場，認真念舊。將於四月一日升呢做主席嘅梁昌明，喺內地投資電動車電池生意，市場佔有率排名第三，工作繁忙加上即將接下主席火棒，相信未來一年佢有排忙。
鄭承隆將卸任主席
至於身為新民黨副主席嘅鄭承隆話，三月底卸任仁濟主席後，將全力投入黨務工作，佢透露已喺荃灣市區租咗寫字樓，作為該黨新界西嘅大本營，元旦後已正式運作，佢落莊後就會去嗰度「返工」喇！
卓妮