新聞故事：推廣單車安全 港女做大使
李慧詩去年倫敦奧運勇奪銅牌，連人帶單車衝向國際。一班美少女組隊挑戰高速「梗牙單車」（Fixed Gear），揚言追求「人車合一」的快感，同時以「卡哇伊」的繽紛色彩組裝座駕，看似表裏不一，卻又毫不突兀，大量騎車靚相更吸引網民瘋狂點擊。單車再次帶港女衝出典型框框，成為道路安全大使。
「車架係粉紅色、車軚係白色、車轆係藍色，總之撞到七彩，cute爆！」戴白色冷帽的曹殷瑜（Viola）一身輕便運動裝，正好配襯單車的可愛style。身處的單車舖亦洋溢青春活力氣息，玻璃門上印滿白雪雪波點，牆身掛着色彩繽紛的單車架和頭盔，還有五顏六色的單車配件。「我細個唔識踩單車，一次偶然見到雜誌介紹梗牙單車，覺得款式好靚，於是用六千蚊買咗我第一架單車！」她說。
無「迫力」、車速高的梗牙單車在本港興起，吸引年輕男女，因單車車輪無「啤令」，車手要不停踩腳踏前進，煞停就只靠停踩腳踏或擺橫「甩尾」，至近年部分新款才添置煞車系統。「固定齒輪令腳踏同車轆同步前進，有人車合一嘅感覺，好似同架車識溝通咁！」Viola指梗牙單車結構簡單，用家可以自行維修，「增加人同單車嘅聯繫。」
「踩單車唔使鬥快」
單車還載她連繫其他同路人。Viola自爆曾為典型「港女」，餘暇不外乎行街睇戲食飯，「單車畀我新嘅生活方式，識人多咗。」她踏單車不久，就認識一班熱愛單車的女生，組織成「香港梗牙單車少女」（Hong Kong Fixed Gear Girl），成員Lynn一頭紅髮，穿黑色皮褸加單車手套，入型入格。二人甫見面便「雞啄唔斷」，她們說組織騎單車是其次，聯誼活動才是主角。「我哋女仔踩單車唔使鬥快，最重要一齊開開心心傾吓偈，去唔同地方影靚相！」
一次在吐露港公路單車徑的意外，激發起Viola推廣單車安全的決心。「有個女仔喺隔籬cut線後急停，我連人帶車飛咗出去。」Viola因此右手重傷及腦震盪，休息近一個月。她感觸地說：「好多人鍾意踩單車，但無安全概念，以為有路就踩得。其實單車都要跟足交通規例，要讓人、轉線時要打手勢！」
圖：潘嘉倫
文：林偉軒