香港數碼廣播（dbc）商業糾紛遲遲未解決，股東黃楚標日前提出收購dbc建議，但反被創辦人鄭經翰（煲呔針）拒絕簽約。人民力量立法會議員黃毓民就喺網上電台節目連環爆粗狂插煲呔針，話佢點一大批人聲援自己其實係搵人老襯，做法無恥︰「滿口仁義道德，咪又係要錢！」
毓民前晚喺網上電台仲指摘煲呔針喺dbc停牌一事上都有責任︰「又要做英雄，又要攞番啲錢，大是大非我撐你……但人哋應承買股份，你又講有啲條件不能接受，點大批人聲援你，搵老襯！無恥！」佢又話，黃楚標攞番個牌有權只講民生議題，而發牌條件亦冇列明一定要講政治，所以唔可以話人唔講政治。
毓民嬲到爆晒粗段片喺網上熱傳，佢嘅拍檔人民力量議員陳偉業尋日話，毓民咁憤怒，都係因為佢睇唔過眼煲呔針利用市民幫自己撲水：「又話籌款打官司，依家唔知點，啲錢係咪畀番人吖？」