政府尋日又公布多個法定機構同諮詢委員會任命，其中工業貿易諮詢委員會有多名「富二代」同「唐營」工商界人士獲新委任或再度委任，包括中總立法會議員梁君彥兒子梁宏正、德國寶太子女陳嘉賢、工業總會主席鍾志平、中華廠商聯合會副會長吳永嘉等，全部為期一年。特首梁振英（CY）一向被指缺乏工商界支持，今次任命唔通係想拉攏佢哋撐自己今後嘅施政？
CY喺統戰敵陣之餘，當然唔會遺忘向喺特首選舉期間支持過佢嘅「梁粉」分餅仔啦。政府尋日公布委任佢嘅忠實支持者羅康瑞做機場管理局成員，接替夠鐘卸任嘅前香港應用科技研究院主席黃子欣，任期三年。
雖然政府同時公布續委民建聯立法會議員陳鑑林及民主黨立法會議員何俊仁做機管局成員，但都沖淡唔到再有「梁粉」獲委要職嘅色彩囉，說到底最緊要都係任人唯才。