政情：搵伴難過打官司 袁國強嘆奈何
律政司司長袁國強（Rimsky）係新政府少有未婚嘅鑽石王老五，箇中因由仍然係個謎。Rimsky早前接受香港律師會月刊訪問時，罕有地坦承喺搵老婆方面好「失敗」，自言並非想單身，但覺得呢件事相比處理法庭案件要複雜得多。佢又話，工作同生活之間嘅平衡，完全係個人選擇同個性問題，而佢就最享受工作與生活剛好各佔一半喎。
未能讀醫 父親失望
Rimsky喺訪問中自爆，童年時喺黃大仙嘅公屋成長，佢爸爸係公務員，從事木匠工作，思想亦好傳統，一直希望佢將來可以成為受人尊敬嘅醫生，奈何佢當年就讀伊利沙伯中學分科時，未獲理科班取錄，意味未能選讀醫科、工程學同電腦等科目，所以佢爸爸當時都有啲失望。
不過，Rimsky喺中四嗰年，因緣際會聽咗個同法律有關嘅職業講座，所以決定修讀法律學科，半年前佢仲加入政府出任律政司司長，佢自言依家會將自己看作為香港法律服務嘅推銷員。唔知佢推銷法律之餘，會否向異性推銷吓自己呢？