政情：Tree根精神 一味嚇人
港鐵南港島線（東段）將會使用無人駕駛嘅全自動列車控制系統，其實呢個系統唔係新鮮事，香港嘅迪士尼線、機場列車都係無人駕駛。不過，立法會交通事務委員會鐵路事宜小組尋日討論時，好多議員好似發現新大陸咁，勁擔心列車無人駕駛就會「追撞」，民建聯鍾樹根就繼續貫徹「Tree根」精神，一時擔心有海嘯、一時擔心釣魚島會打仗令南港島線故障，乘客會被困隧道喎！
田北辰憂會追撞
南港島線（東段）由海怡半島經利東、黃竹坑、海洋公園接駁至金鐘，全長七公里，車程約十一分鐘。鍾樹根、新民黨田北辰、民主黨胡志偉、工程界盧偉國等一眾議員都擔心無人駕駛系統唔安全，驚架列車會行行吓「跪低」咗喺隧道內，乘客喺冇車長幫手下疏散唔到。做過九鐵主席嘅田北辰仲話，內地溫州都發生過列車追撞事故，問港鐵點樣確保唔會發生。
當中樹根嘅「偉論」最嚇人：「如果有災難性嘅事故發生點算？唔好話冇可能呀，邊個諗到福島會有海嘯？可能過幾個月釣魚台（島）打仗，有傻佬丟個炸彈、飛彈過嚟！邊個估到日本仔可能會打香港？」港鐵總機電工程師梁志立初頭回應仲好有耐性咁解釋，話呢套列車系統喺九十年代已經開始使用，有安全系統防相撞，當有故障時，中央車務控制中心仲可以指令列車自動修復，唔使人手操作，亦有後備電源。
港鐵有應變方法
不過，樹根就繼續追問：「咁後備電都壞埋，列車同控制中心失去聯絡點算，車上有司機廣播疏散乘客係咪好啲先？」梁志立開始冇佢咁好氣：「咁列車上嘅通訊系統都有機會壞嘅。」佢仲話，話萬一有列車故障停駛，可以用另一架列車將佢推埋站喎，真係唔知佢講真定係隨口噏應酬議員喇。其實議員與其擔心無人列車系統嘅安全，倒不如睇吓港鐵會否因為慳咗車長人工而減票價好過啦！