中環出更：莊學山太太 搞手袋社企
中華總商會副會長莊學山太太吳時熱心公益，體恤弱勢社群，事關佢同老公幾年前已開辦社會企業，打造走高檔路線嘅香港品牌毛衣，成為社企榜樣。近日，兩人再下一城開手袋社企，卓妮早前見莊太出席商會活動時，拎住一個灰色鴕鳥皮手袋，款式迷你別致，細問之下，原來係自家設計出品。
聘10員工 小試牛刀
莊太請纓設計，話晒佢都「閱袋」無數，從用家角度出發，手袋格數好實用，加埋鴕鳥皮，夠晒矜貴，咁獨一無二嘅手袋只賣千多元。平靚正有原因嘅，皆因手袋由社企工人製造，都係扎根香港工業界多年嘅資深技工，車工精細，質素媲美歐洲名牌出品。
莊太話，社企依家請咗十個員工，小試牛刀，嚟緊會推出更多新款手袋，顏色齊備。新手袋仲會擺喺自家專門店賣，如果成績理想，話唔定遠銷外國喎。