中環出更：郭永亮為對仔大修安樂窩
香港青年聯會秘書長兼城中名人許晉亨外甥郭永亮（Andy），結婚四年已育有兩個可愛精靈嘅囝囝，早前先至見佢同太太黃兆賢帶住兩個仔逛商場，好溫馨。本周三下午大約四點零鐘，卓妮又喺中環歷山大廈一間餐廳見到Andy約埋三位男士密密傾，冇耐太太都加入討論，眾人全神貫注睇住一張張圖則係咁傾，天黑都唔願走，唔知搞緊咩大製作呢？
當日Andy先同三位男士會面，卓妮見佢哋睇緊圖則，又有一張張繪有電視、梳化等家居擺設嘅彩色圖，似足傾緊裝修。期間Andy起身打電話，似係Call緊太太出嚟一齊傾，約一小時後郭太果然現身。卓妮尋日致電Andy查詢，估唔到佢已飛到海外公幹。Andy直認，佢位於港島半山嘅大宅啱啱開始搞緊大裝修，當日特登約裝修公司啲人傾談細節。
Andy話，今次裝修係為咗一對囝囝而搞嘅，事關間愛巢原本係佢同太太嘅二人世界，但隨住兩個囝囝出世，屋企布局同擺設唔係咁啱亂蹦亂跳嘅小朋友，所以佢不惜落重本將屋企大變身，務求色彩同埋布置得意啲，又冇咁容易撞親，畀小朋友一個快樂成長又安全嘅安樂窩。見佢講到滔滔不絕，認真係個好爸爸。
諗住再生B
現時Andy已舉家搬到另一個自置單位暫住，佢話希望四、五月份可以搬返去大宅。卓妮見Andy成個住家男人咁，忍唔住打蛇隨棍上，問佢會唔會趁機砌多一間房出來，迎接新成員？Andy聽罷哈哈大笑，大方承認的確考慮緊再製造小生命，咁就要預早恭喜定佢先喇。
卓妮