新官上任加入政府呢個熱廚房，炒唔炒到一手好餸都係後話，最重要係身家清白同唔好有啲陳年臭史，搞污糟個廚房要人執手尾。政制及內地事務局副局長劉江華同財政司司長政治助理羅永聰（Julian）兩位官場新貴，佢哋嘅個人利益申報資料日前喺網上公開，兩人一老一嫩，一個做開議員，一個做開傳媒，共通點係大家都係一窮二白，無物業、無車位，亦無開公司，唔怪得之要另謀高就啦！
我哋喺兩年前講過，劉江華當時面向吐露港嘅自置業物，因為前面起新樓而冇咗個海景，佢激氣過頭就賣咗佢，寧願租過另一個有海景嘅單位住住先。事隔兩年，劉江華收咗上屆立法會筆約滿酬金，依家又加薪數倍做咗副局長，但佢依然未有上番車，繼續做無殼蝸牛租樓住。
其他利益方面，劉江華申報自己係民建聯同公民力量成員，另有馬會及兩個同鄉會嘅會籍。Julian就真係身家清白喇，物業、公司股份、政治聯繫，甚至連會籍都無，唯一新資訊係佢太太叫許雅婷，任職教師，將來幫財爺制訂預算案時，肯定唔會有利益衝突。