政情：邀猛人講國際形勢 何志平積極搞外交
中華能源基金委員會尋日喺跑馬地搞咗個午宴沙龍，邀請到聯合國大會主席武克‧耶雷米奇（Vuk Jeremi'c）出席，並就國際社會關注嘅議題解答現場嘉賓嘅提問，吸引城中政商界人士捧場。中華能源基金委員會常務副主席兼秘書長何志平係今次午宴嘅大搞手，佢話退休後主力做民間外交嘅事務，希望促進中國外交文化發展。
籲港人要高瞻遠矚
問何志平對今屆政府有乜意見？佢就話政府的確需要多啲祝福，多啲人幫手！但佢認為香港係多元社會，有唔同嘅聲音係必然嘅事，對於近年遊行常見高舉港英旗情況，佢就話因為部分港人嘅地方主義仲係好重，香港人應高瞻遠矚啲，好好利用香港嘅經驗、優勢同與國際嘅關係去發展。
委員會下月仲會邀請中、美、日嘅學者同專家嚟講三國關係添，睇嚟何志平做唔到政務司副司長，依家不時搵啲猛人講吓國際形勢，研究吓國際事務，都係另一崗位服務社會啫。