政情：iProA大掃除 為選戰鋪路
互聯網專業協會（iProA）近年風雨飄搖，屢次捲入政治風波。正所謂「見過鬼都怕黑」，菁英會榮譽主席洪為民（Witman）獲連任iProA會長後銳意革新，適當減少iProA嘅社會服務，專注番喺會員服務方面，希望省番靚個招牌之餘，某程度上亦可為四年後重奪立法會資訊科技界議席奠下基礎，絕對係「一石二鳥」。
iProA日前舉行周年會員大會，今年五月臨危受命接替提前辭任嘅鄧淑明出任會長嘅Witman，再度獲得支持連任會長一職兩年，Witman當選後不敢怠慢，即時向會員拋出未來兩年大計，就係適當減少社會服務，做番多啲同會員相關嘅服務，頭炮係喺明年三月到湖北武漢了解當地嘅高新科技發展，之後亦會舉辦一系列業界研討會。
屢捲入政治風暴
此外，Witman亦着手樹立形象，首先計劃向iProA轄下各個委員會「把脈」，如果有重複職能嘅或會二合為一，其次亦會詢問各委員會主席嘅未來大計，確保各委員會都有實務工作，另一方面又會招攬多名年輕業界人才加入，為iProA注入更多新血。
事實上，Witman連番大計都同會員息息相關，明眼人都睇得出iProA似乎有意遠離政治呢個是非之地，事關iProA近年屢次捲入政治風暴之中，先有前任會長鄧淑明捲入特首選舉，疑有份為前政務司司長唐英年製作偷步競選網站，後有前資訊科技總監葛輝指控前朝政府喺招標上網學習支援計劃中「明益」iProA。而曾任會長嘅民建聯葛珮帆，多次搞到外間視iProA為建制派組織甚至同該黨關係密切，真係水洗都唔清。
有業界中人更形容，iProA整頓後重新出發，客觀效果亦有助凝聚會員，甚或係為部署奪回資訊科技界議席做好準備，事關iProA有唔少會員都係業界選民。至於將來由邊個披甲上陣重奪議席，依家講人選真係言之尚早，但可以肯定嘅係，做好團結業界工作對日後百利而無一害喎，唔知呢啲可唔可以叫做「放長線釣大魚」呢？